তুমি ৰং বুট’লিছা?

তুমি ৰং বুটলিছা?

নীলাচলৰ নীলা বৰণ গোটালানে?

আৰু মানাহ নদীৰ স্বচ্ছতাখিনি সামৰিলা জানো?

ল’বা কিন্তু একাজলি সোণাৰুৰ হালধীয়া,

আৰু ন খেতিৰ চকুৰোৱা ৰঙ, কলপতীয়া ।

সন্ধ্যা আকাশৰ হেঙুল আনিছানে তুমি?

থুঁপাই থোঁৱা কাষতে খৰিকজাঁইৰ শুকুলা আভা

তেজ ৰঙা বেলিটিৰ এচলু ৰক্তিমা…..

ক’লা লৈ অপেক্ষাৰত নিশাৰ কৃষ্ণবৰ্ণী দেহা ।

জ্যেষ্ঠৰ আশীর্বাদত,জ্ঞানৰ পোহৰত পাবা নানা বৰ্ণ,

ৰঙৰ ভঁৰাল  এতিয়া তোমাৰ হ’ল পৰিপুৰ্ণ ।

গোটালানে তুমি বাৰু জীৱনৰ চিত্ৰফলক?

স্রজিবা তাতেই নানাৰঙী 

ভাবনাৰ সপোন আৰু দিঠক ।

বোলাই দিয়া তুলিকাত ভিন্ন ৰং 

আৰু সাঁজা মানবতাৰ আকৃতি,

ঢালি দিয়া আশাৰ চানেকি,

কৰি যোৱা নিতে তুমি নৱ নৱ সৃষ্টি ।

পুৰ্ণ শেহান্তৰ ছবিখনি মোক দিবা,

বিচাৰিম তাৰ বৈভিন্নতাৰ মাজত

অত’ যুগে বিচাৰি নোপোৱা

ঐক্যতাৰ সাঁচ, আৰু অনাগত দিনৰ

প্রগতিৰ ঠিকনা……………